Qırımda açlıq (1921 - 1923)
Qırımda açlıq (1921-1923) — Qırım Muhtar Sovet Sotsialist Cumhuriyeti ve Şimaliy Qara deñiz regionı (evelki Tavriya guberniyasınıñ topraqları) territoriyasında olğan büyük açlıq. Açlıqnıñ sebepleri İçki cenkniñ ve bolşeviklerniñ muvafaqiyetsiz iqtisadiy siyasetiniñ aqibetleri edi. Açlıqnıñ birinci alâmetleri 1921 senesiniñ ekinci yarısında peyda oldı. Mahsus organ - Açlıq çekkenlerge yardım etüv merkeziy cumhuriyet komissiyası (rusça Крым ЦК Помгол) teşkil etildi. Açlıqqa qarşı küreş içün aşayt mallarnı üleştirüv, aş payları sistemasını işletüv, bağışlar, diniy cemaatlardan qıymetli şeylerini musadere (konfiskatsiya) etüv, balalar evleri ve aşayt noqtalarını teşkil etüv kibi çareler körüldi. Lâkin açlıqtan eñ çoq zarar körgen köylerde bu tedbirler yahşı yardım etmedi. 1922 senesiniñ yazında halqara teşkilâtlar yardım etip başladılar. Açlıq zamanında, çeşit tahminlerge köre, 100 biñge yaqın adam elâk oldı, olarnıñ çoqusı köylüler edi, milliy terkibi ceetinden ise eñ büyük qurbanlar qırımtatarlarğa tüşti (76 biñ)[1].