Kırım Tatar Şarkıları
Kırım Tatar Halk Şarkıları (türkçeden Qırımtatar Halq Yırları) - Zsuzsa Kakuk tarafından azırlanğan 1993 senesi Türkiyede neşir etilgen bir kitap.
Birinci Cian Cenki vaqtında (1914-1918) Avstirya-Macaristan İmperiyası topraqlarında Rusiyeli esirler arasında tapılğan musulman askerler içün eki lager qurulğan edi. Birinci lager Eger şeeri yaqınlarında edi. Mında ekseriyetnen Qazan Tatarları, Mişerler bar edi. Ekinci lager Estergon şeeriniñ tış maalesinde qurulğan edi. Bu lagerdeki esirlerniñ çoqusı Qırımdan ve Kavkazdan kelgen askerler edi.
Belli Macar türkşınas İgnats Kunoş (Ignác Kúnos) cenk boyunca er yaz bu lagerlerge barıp türkiy tillerde laf etken esirlerden zengin folklor materialı toplağan. Kunoş qırımtatar halq yırlarını, manelerini, Estergon lagerinde topladı. 1945 senesinde vefatından soñ apayı bularnı Macar İlimler Aqademiyasına sattı.
Zuza Kakuk (Zsuzsa Kakuk) tarafından 1978 senesi bir arağa ketirilgen bu cıyıntıq, 1993 senesi Türk Dil Kurumu tarafından neşir etildi.
Kitapta 447 mane, 137 yır bar. Em manelerniñ, em de yırlarnıñ mevzusı ekseriyetnen aşq aqqında. Yırlarda Qırımtatar tarihındaki qaramanlıqlarğa da rastlana, erek qalınğan vatan asreti is etile.
Bağlantılar
[deñiştir | kodunı deñiştir]- Kırım Tatar Şarkıları - Zsuzsa Kakuk, 1993 Türk Dil Kurumu Yayınları Yayın No:564 ISBN:975-16-0574-1