Tatar içün

QIRIMTATAR VİKİPEDİYASINIÑ MALÜMATI
Jump to navigation Jump to search

Tatar içün — qırımtatar ulu şairi Amdi Giraybaynıñ 1921 senesi yazğan bir şiiri.

Şiir[deñiştir | kodunı deñiştir]

Tatar alın teftiş etip cürgende,
Men bu öksüz tatarlarnı körgende,
Közyaş tökip, cılamağa başlayman,
Cavnıñ küçün közden töben taşlayman.

Büyük bir küç tabaman men özümde,
Balq-calq etip caşın caşnay közümde,
Çal saqallı bir qart kele qatıma,
Men cer tepip atlanaman atıma.

Bir arslanday baş tikleymen turaman,
Sanki cavnı qalbinden uraman
Keñ temelni ineçikmen qazaman,
Yemin etip şu sözlerni yazaman:

Tatar içün ceennemde yanarman,
Tatar içün qızıl otqa atarman,
Tatar içün kölmegimni satarman,
Men Altaynıñ bir çeçegi tatarman!

Qol köterip tatar, tatar, degende
Tatar qanı sıñırlarğa kelgende
Men dünyağa bir cumurdıq urarman,
Duşmanımnıñ tacın, tahtın qırarman!

Tatar içün deryalarnı tıyarman,
Bir ineniñ teşigine sıyarman,
Tatar içün incerermen, azarman,
Tatar sözün baştaşıma yazarman!

Tatar içün darağaçqa asılsam,
Topraq bolıp ayaqlarman basılsam,
Cer astında kene de şay aytarman:
Tatarman dep, men ahretke qaytarman!