Qorqmañız, Tatarlar!

Qorqmañız, Tatarlar! — qırımtatar şairi Şakir Selimnıñ (1942 – 2008) 2000 senesi yazğan bir şiiri.

Şiir

Ey siz, öz adından qorqqan tatarlar,
Mashara olmañız, kene satarlar!
Aytıñız, tatardan qorqmağan kim bar?
Olurmı, qardaşlar, qorqudan inkâr?!

Oğuzman, qıpçaqman degenden köre
«Tatarman!» deseñ olmazmı, törem?
Bu addan duşmannıñ yuqusı qaça,
«Tatarva» dünyağa şan-şüret saça.

Bu adnen buv kibi ğayıp olmazsıñ,
Bu adsız Vatanğa saip olmazsıñ.
Yoq, bu ad bizlerge lağap degildir,
«Lağap» degenlerniñ başın egildir.

Mesele lağapta ve adda degil,
Mesele — cigitlik, cesürlikte, bil!

Baş saqlap qaçsañ «dubinkalardan»,
Yavnı fırlatmasañ uçurım-cardan,
Duşman vaqıf olsa er bir sırıñdan,-
Söyle, ne fayda bar böyle «Qırımdan»?

Elge taş alıp da atmasañ eger,-
Üstüñe kene de yün-teri cabın,
Qobaña bar da, taşlarğa abın!…

Cınğızdan çoq evel biz mında edik,
Aslında biz mında doğğanmız dedik;
Barsın, «uçonıyın» biñ mana tapsın,
Tatardan vazgeçmem, ne yapsa yapsın!

Bütün milletlerin menden töregen,
Asiyañ, Avropañ köz qıpıp yürgen,
Tamırın-hamırın rus menden alğan,
Qara mazinleriñ Qaramzin olgan.

Baq sen, kubanlıman degen qazaqqa,
Epsiniñ qanında tatar taparsıñ,
Soñ nasıl eter de adıñ satarsıñ?

Ey, Sen Vatandaşım, terence oylan,
Şu şanlı adıñnen küreşke şaylan!