Naciye Ametova

QIRIMTATAR VİKİPEDİYASINIÑ MALÜMATI
Jump to navigation Jump to search
Naciye Ametova
Zenaatıyazıcı

Naciye Refat qızı Ametova (Useinova) (1959 d.) istidatlı icatkârlardan biridir. O, esasen balalar içün yazğan ikâyeleri, masalları ve şiirlerinen bellidir.

Naciye Ametova 1959 senesi sürgünlikte yani Özbekistannıñ Sırdarya vilayetindeki “Özbekistan” kolhozında Refat ve Zevriye Ametovlarnıñ çoq balalı qorantasında dünyağa keldi. Onıñ eki aptesi, bir ağası ve eki oğlan qardaşı bar edi. Olarnıñ epsi aliy tasilge saip ediler. Naciye hanım 1976 senesi Telman adına 19 sanlı umumtasil mektepni bitirdi. 1977-1982 seneleri Nizamiy adına Taşkent Pedagogika İnstitutınıñ Rus ve Qırımtatar tili fakultetlerinde oqudı. Bunıñnen beraber “Lenin Bayrağı” gazetasınıñ muarriyetinde açılğan “Köy ve şeer gazetacılığı universiteti” aqşamlıq kursunı bitirdi. İnstitutnı bitirgen soñ onı, çalışmaq içün “Lenin Bayrağı” gazetasına yolladılar. Birinci senesi mektüpler bölüginde esapçı soñra sanat ve sovet qurucılığı bölüklerinde mühbir olaraq çalıştı.

1989 senesi “Yıldız” mecmuasına keçirildi. O, 1992 senesine yani Qırımğa köçürilgenge qadar anda üyken muarrir olıp çalıştı. 1995 senesi Qırımtatar muzıkalı drama teatrinde Qırımtatar tilinde ders berdi. Bunıñnen beraber Qırımtatar radiosı balalar içün eşittirüvler programmasında ikâyelerinen sıq-sıq çıqışta bulundı. 1996 senesiniñ ekinci yarısında itibaren ise “Qırım” serbest içtimaiy-siyasiy gazetasında sanat ve medeniyet bölüginde çalışa. Sanat, medeniyet, maarif saasında edebiyatı aydınlatqan tercimeler yapmaqta, balalar içün ikâye ve şiirler yazmaqta, 2004 senesinden berli “Çoqraq” balalar saifesini çıqarmaqtadır.

Birinci şiiri “Balqurtçıq” 1975 senesi “Lenin Bayrağı” gazetasında derc olunğan edi. Ondan soñra balalar içün yazğan şiirleri ve ikâyeleri “Lenin Bayrağı” gazetasında derc olındı. Neticede Naciye 1976 senesi ötkerilgen “Özbekistan cumhuriyet yaş icatkârlarnıñ seminar muşaveresi”ne qatıldı.

1982 senesi Taşkentteki edebiyat ve sanat neşriyatında müelliflikte “Qarılğaçlar” şiirler çıyıntığı çıqtı. 2000 senesi “Dağda Bayram” ikâyeler ve masallar kitabı derc olundı. Masallar ve ikâyelerinde balalarğa büyüklerge ürmet, emek-severlik, dostluq kibi hususiyetlerni aşılamağa ziyade diqqat ete. Qırımğa köçip kelgen soñ onıñ ikâyeleri “Qırım”, “Sudaq Sesi”, “Krımska Svitıtsa” (Кримська Світлиця) gazetalarında ve “Yıldız” mecmuasında sıq-sıq neşir etile. O, evli bir oğlu ve bir qızı bar. Naciye Ametova 2002 senesinde Ukraina Yazıcıları Milliy Birliginiñ, 2004 senesinde de Ukraina Gazetacılar Birliginiñ azası olğandır.

Menbalar[deñiştir | kodunı deñiştir]