Özbek Han Camisi
Özbek Han Camisi — Özbek Han 1312 senesi Uluğ Ulus tahtına keçken soñ, islâm dinini qabul etken ve Solhat (Eski Qırım) şeerinde güzel bir caminen beraber aliy musulman diniy oquv yurtunı – medreseni qurmasını emir etken edi. Caminiñ qurulışı 1314 senesi başlanğan edi. Türk seyahatçı Evliya Çelebige köre, 1512-1513 seneleri I Meñli Geray zamanında Özbekhan camisi baş cami olıp sayıla edi. XIV asırda caminiñ cenüp tarafında, şimdi viranege çevirilgen medrese qurulğan edi. Medreseniñ kiriş qapusı cenübiy tarafında olğan edi. Azbarı büyük ve açıq, ortada çeşmesi bar edi. Uluğ Ulus ve qırımtatar mimarlıqnıñ meşur abidesi, Qırımnıñ eñ eski saqlanğan mesciti. Eski Qırımda buluna.