Qorqaq (şiir)
Qorqaq — qırımtatar şairi Bekir Çoban-zadeniñ 1914 senesi Odesada yazğan bir şiiri.
Şiir
[deñiştir | kodunı deñiştir]Er kölge biñ can bergen, yaşatqan
Dıvardaki er sızıqnı cin, saytanğa oşatqan...
Sandıçığı çırt-çırt etse, boşasa,
Qapışını çik-çik erken sarı qurtlar aşasa,
Boş tüfekke «Şaytan işi, patlar!...» degen er zaman,
«Pat! Pat!» etse qorqup olğan toz, duman,
Caş ağaçnıñ kölgesinde «Yamandır» dep yatmağan.
Mort ağaçtan zikir, mevlüd tıñnağan,
Cin, şaytanğa yol bastırıp, qanıp yürgen tañğaçek;
Soñ qorazda basıq üyün, reca, niyaz tapqaçek;
Esi ketken hucur bir halq bar eken,
Bu halq qaysı? Bunı barmı bilmegen?...
Yedi düvel tanınmağan, bar dünyağa bel buvğan,
Lafqa qalsa, er yigitmen, aydamaqman dost bolğan,
Yigitligi qaraldısın taş dıvarın keçmegen,
Saranlıqta, men-menlikte sıñır, ölcü bilmegen.
Öz özüne ağa bolğan, sultan bolğan habersiz,
Yañğız qalsa yedi derya keçken atsız, yegersiz,
Üyde zalım, toyda yigit, lafları şay arslanday,
Qaçqan, köçken cansız bir halq bar eken,
Bu halq qayda, bunı bar mı bilmegen?...
Men baş bolsam, bir kün kelip yekilsem,
Onı duşman ortasına sürermen,
Top yerine onıñ ötün patlatıp,
Duşmannıñ tap taht üyüne kirermen.
- Odesa, 1914