Hilari Meri Mentel

QIRIMTATAR VİKİPEDİYASINIÑ MALÜMATI
Buña bar: qullan, qıdır

Hilari Meri Mentel (inglizce Hilary Mary Mantel) - belli ingliz yazıcı, roman ve qısqa ikâyelerniñ müellifi, edebiy tenqitçi. 2009 senesi "Wolf Hall" adlı romannıñ içün Buker mukâfatı aldı.

Hilari Meri Mentel 1952 senesi iyül 6 künü İngiltereniñ Derbişir vilâyetinde Glossop şeerinde dünyağa keldi. Balalıqta Hedfild (inglizce Hadfield) fabrıqa qasabasında yaşadı. İlk tasilini yerli katolik mektebinde aldı. Orta tasilini "Harrytown convent" adlı katolik mektebinde aldı. 1970 senesi London İqtisadiyat Mektebinde (inglizce London School of Economics) uquq ögrenip başladı, soñ o Şeffild Universitetine (inglizce University of Sheffield) keçti. 1972 senesi aqayğa çıqtı. 1973 senesi bakalavr derecesi alğan soñ geriatrik hastahaneniñ içtimaiy işler bölüginde çalıştı. 1974 senesi "A Place of Greater Safety" adlı roman yazıp başladı. 1977 senesi aqayınen Botsvanağa yürdi. 1985 senesi onıñ "Er Bir Kün - Ananıñ Künüdir" ("Every Day is Mother's Day") adlı birinci roman basılıp çıqtı. Yılından ögdeki romannıñ devamı "Vacant Possessıon" adlı roman neşir etildi. 1989 senesi onıñ "Fludd" adlı romannıñ içün Vinifred Holtbi hatırasınıñ mukâfatı aldı. 1993 senesi Fransız inqilâp erbaplarıniñ ayatları aqqında yazğan "A Place of Greater Safety" adlı tarihiy roman "Sunday Express Book of the Year" adlı mukâfat aldı. 1996 senesi "An Experiment in Love" adlı romannıñ içün "Hawthornden Prize" aldı. 2003 senesi "Giving Up the Ghost" adlı memuarlar neşir etildi. 2006 senesi Hilari Meri Mentel Britanya imperiâsiniñ komandorı nasıp etti. 2009 senesi qıral VIII Genriniñ naziri olğan Tomas Kromvel ayatı aqqında yazğan "Wolf Hall" adlı tarihiy roman neşir etildi.