Remziye Alper

QIRIMTATAR VİKİPEDİYASINIÑ MALÜMATI
Remziye Alper
Doğma adı türkçe Remziye Alper
Doğğan künü 1944 sentâbr 30(1944-09-30)[1] (79 yaşında)
Memleketi
Zenaatı opera yırcısı
Ömür arqadaşı Orhan Tanrıkulu

Remziye Alper (1944 s. d.) – Türkiyeli belli qırımtatar tamırlı opera sanatkârı-soprano.


Remziye Alper Tanrıkulu 1944 senesinde Qırımnıñ Sudaq şeerinde dünyağa keldi. Daa eki aylıq ekende ailesi Qırımdan köçip Avstriyağa ketti. Avstriyanıñ Bregenss şeeri ve Alberşvende lagerinde 4 sene qaldı. Daa soñra Türkiyege yerleşti. Frida Böhme, Carlo Galeffi, Maria Carena kibi ocalarnıñ közetüvinde oquğanı Ankara Devlet konservatoriyasınıñ yüksek bölügini 1963 senesinde bitirdi. Daa konservatoriyadada oquğan sırada Almaniyadan kelgen şan pedagogı Prof. Clemens Glettenberg onı tınlap çoq muvafaqiyetli olacağını añlap Münihteki yaz kurslarına davet etti. Lâkin talebeliginde ailesiniñ imkânları yetmegeni içün ketalmadı. 1964 senesinde Ankara Devlet Operasında çalışa ekende Prof. Glettenbergniñ yañıdan davetinen bu kurslarğa qatılıp üstün bir muvafaqiyet kösterdi. Daa soñra bu muvafaqiyeti sebebinen, Alman ükümeti tarafından eki senelik DAAD bursunen mukâfatlandırılıp Köln Muzıka Yüksek Mektebinde Prof. Peter Witschnen çalışalma imkânına saip oldı. Mındaqı oquvnı tamamlağan soñ kene Türkiyege qaytıp, Ankara Devlet Operasındaki vazifesine devam etti.

1969 senesinde orkestra şefi Orhan Tanrıkulunen evlendi. 1974-de Romağa ketip Santa Cecilia akademiyasıniñ imtaanlarını qazandı ve namlı metso-soprano Gianna Pederzininen Verdi operaları hususında çalıştı. Niayet mında aqiqiy ses renki olğan lirik-spinto sopranolığı keşif etildi. Santa Cecilia akademiyasını halq jürisi aldında bergen imtaanda birincilik alıp bitirdi.

Remziye Alper, 1975 senesinden berli Ankara Devlet Operasında aytqanı prima partilerini qatında, AQŞ, İtaliya, Almaniya, Belçika, Frenkistan, İspaniya, Bulğaristan, Macaristan, Romaniya, Avstriya kibi memleketlerde pek çoq kontsert berdi, opera temsillerinde oynadı, resitaller ve radio televizion içün programmalar yasadı. 100.cü sene programı çerçevesinde AOŞ ve Avstriyada kontsert ve resitaller berdi.

1982 senesinde İstanbulğa kelip İstanbul Devlet Operasında solistlikke devam etti, pek çoq zor operada baş rol oynadı ve milletlerarası kontsertlerini devam ettirdi.


Remziye Alper türlü yarışmalarğa qatılıp pek çoq milletlerarası mukâfat aldı.

  • 1974 Busetto-Parma, İtaliya, 14-nci Milletlerarası Verdi Sesleri Yarışması, 3-lük mukâfatı
  • 1974 Palermo, İtaliya, 11-nci Milletlerarası Yaş Opera Sanatkârları Yarışması, 1-lik mukâfatı
  • 1975 Lonigo-Verona, İtaliya, 12-nci Milletlerarası Kariyer Sanatkârları Yarışması, 3-lük mukâfatı
  • 1976 Sofiya, Bulğaristan, 6-ncı Milletlerarası Şan Yarışması, Konsert Sanatkârlığı, 1-lik mukafâtı
  • 1976 Zaltsburg, Avstriya, Milletlerarası Yaş Sanatkârlar Yarışması, Grand City mukafâtı
  • 1976 Plevne, Bulğaristan, Katia Popova Fest., Plevne Bülbüli Altın Medali

Bağlantılar[deñiştir | kodunı deñiştir]

Remziye Alper 7 noyabrniñ 2008 s. arhivlengen.

  1. Library of Congress Authorities (англ.)Library of Congress.